Sot u mbajt takimi i Këshillit për Tranzicion të Drejtë, në të cilin u diskutuan hapat e ardhshëm për zbatimin e procesit të tranzicionit të drejtë. Fokusi ishte vendosur te koordinimi institucional, harmonizimi me Agjendën e Reformave, sigurimi i mbështetjes financiare dhe masat për mbështetjen e të punësuarve në sektorin energjetik.
Anëtarët e Këshillit bënë një rishikim të progresit në zbatimin e Planit Vjetor për Tranzicion të Drejtë, ku u konstatua se aktivitetet po zhvillohen në drejtim pozitiv, por se faza e ardhshme kërkon koordinim më të fortë institucional dhe mobilizim konkret të instrumenteve financiare për mbështetjen e aktiviteteve prioritare.
Vëmendje e veçantë iu kushtua harmonizimit të Udhërrëfyesit për Dekarbonizim me dokumentet strategjike dhe programet e institucioneve të përfshira në proces, si dhe sigurimit të një qasjeje të koordinuar për zbatimin e reformave që lidhen me tranzicionin energjetik.
“Kur flasim për dekarbonizimin, nuk flasim për një objektiv abstrakt, por për një udhërrëfyes konkret që është pjesë e detyrimeve tona ndaj Bashkimit Evropian. Që ky proces të jetë real dhe i qëndrueshëm, është e nevojshme që ai të integrohet në dokumentet strategjike, programet dhe planifikimin e të gjitha institucioneve që janë pjesë e kësaj agjende”, theksoi ministrja Bozhinovska.
